Şah İsmayıl Xətai prospektində yerləşən 63 nömrəli binanın fasadının təmiri ilə bağlı işlərin uzun müddət dayandırılması barədə sakinlər tərəfindən səsləndirilən iddialara aydınlıq gətirilib.
Gencexeber.az-a Gəncə şəhərində aparılan kompleks abadlıq işləri çərçivəsində həmin binanın təmirini həyata keçirən şirkətin nümayəndəsi bildirib ki, III MDB Oyunları və daha sonra Aerobika Gimnastikası üzrə böyüklər arasında 14-cü Avropa Çempionatının keçirilməsi səbəbindən müəyyən müddət ərzində işlərin aparılması mümkün olmayıb.
"Tədbirlər arasında bəzi işlər görülsə də, oyunlar başa çatan kimi əsas prosesə dərhal start verildi. Hazırda təmir tam gücü ilə davam edir və gündəlik işlər yerinə yetirilir.
Binanın köhnə olması, həmçinin fasadda çoxsaylı qüsurların mövcudluğu səbəbindən daha incə və vaxt tələb edən işlərin görülməsinə ehtiyac yaranıb. Bu səbəbdən müəyyən gecikmələr qaçılmazdır", - şirkətin nümayəndəsi qeyd edib.
Əlavə edilib ki, yaxın 10 gün ərzində binanın tam təhvil verilməsi planlaşdırılır.
