Gəncədə ASAN könüllülərinin ikinci regional karyera sərgisi baş tutub.
Gencexeber.az bildirir ki, tədbirin əsas məqsədi Gəncə, Şəmkir, Göygöl, Samux, Naftalan, Tovuz, Mingəçevir, Goranboy və ətraf rayonlarda yaşayan könüllü gənclərin məşğulluq imkanlarına çıxışını asanlaşdırmaq olub.
Eləcə də regionda fəaliyyət göstərən dövlət və özəl müəssisələrlə gənclər arasında əlaqə yaratmaq, onların peşəkar inkişafına və təcrübə qazanmalarına dəstək prioritet təşkil edib.
Tədbirdə 40-a yaxın müəssisə və təşkilat ümumilikdə 100-dən çox vakansiya təqdim edib. Bununla yanaşı karyera sərgisində 600-ə yaxın gənc aktiv vakansiyalara müraciət və işəgötürənlərlə birbaşa ünsiyyət imkanı əldə ediblər.
2 saylı Gəncə regional "ASAN xidmət" mərkəzində keçirilən tədbir "ASAN xidmət"in və Dövlət Məşğulluq Agentliyinin Gəncə-Daşkəsən Regional Məşğulluq filialının birgə təşkilatçılığı ilə reallaşıb.
