Ali Məhkəmədə 17 yaşlı oğlanı qətlə yetirməkdə təqsirləndirilən Azər Mövsümovun barəsindəki qərardan dövlət ittihamçısı tərəfindən verilən kassasiya protesti və kassasiya şikayəti üzrə məhkəmə iclası başa çatıb.
Hakim İlkin Abdullayevin sədrliyi ilə keçirilən prosesdə qərar elan olunub.
Qərara əsasən, dövlət ittihamçısının kassasiya protesti və təqsirləndirilən şəxsin müdafiəçisinin kassasiya şikayəti təmin edilməyib.
Qeyd edək ki, 2022-ci ildə Gəncədə yerləşən "Rəvan" adlı kafenin qarşısında 1984-cü il təvəllüdlü Azər Mövsümov 2005-ci il təvəllüdlü Həsən Novruzovu bıçaqlayaraq öldürüb.
Gəncə Ağır Cinayətlər Məhkəməsinin hökmü ilə Azər Mövsümov Cinayət Məcəlləsinin müxtəlif maddələri ilə təqsirli bilinərək 17 il müddətə azadlıqdan məhrum edilib.
Gəncə Apellyasiya Məhkəməsinin qərarına əsasən, zərərçəkmiş şəxsin hüquqi varisinin apellyasiya şikayəti və dövlət ittihamçısının apellyasiya protesti təmin edilməyib. Təqsirləndirilən şəxsin isə apellyasiya şikayəti qismən təmin olunub, Gəncə Ağır Cinayətlər Məhkəməsinin hökmü dəyişdirilib, o, 13 il müddətə azadlıqdan məhrumetmə cəzasına məhkum olunub.
Mənbə: pravda.аz
