31 Dekabr – Dünya Azərbaycanlılarının Həmrəyliyi Günü və Yeni ilin gəlişi münasibətilə Gəncə Şəhər İcra Hakimiyyətinin təşkilatçılığı ilə Heydər Əliyev adına Meydanda möhtəşəm atəşfəşanlıq keçiriləcək.
Bu barədə Gencexeber.az-a adıçəkilən qurum tərəfindən məlumat verilib. Bildirilib ki, Yeni il gecəsi şəhərin mərkəzində təşkil olunacaq atəşfəşanlıq Gəncə sakinlərinə bayram ovqatı yaşadacaq.
"Yeni ili yeni arzular, xoş əhval-ruhiyyə və birlik ab-havası ilə qarşılamaq üçün hər birinizi şəhərimizin mərkəzinə dəvət edirik", – Gəncə Şəhər İcra Hakimiyyəti əlavə edib.
Qeyd edək ki, ötən il – 31 dekabr tarixində Gəncə şəhərində rəsmi olaraq nə atəşfəşanlıq, nə də konsert proqramı təşkil edilib. Şəhər meydanına toplaşan sakinlər Yeni ili özləri gətirdikləri pirotexniki vasitələrlə qarşılayıblar.
Xatırladaq ki, bir neçə gün öncə Gəncə Şəhər İcra Hakimiyyətinin İctimai-siyasi və humanitar məsələlər şöbəsi tərəfindən verilən açıqlamada Yeni il və Dünya Azərbaycanlılarının Həmrəyliyi Günü ilə bağlı hər hansı rəsmi tədbirin keçirilməsinin nəzərdə tutulmadığı bildirilib. Sözügedən məlumatın redaksiyamız tərəfindən ictimaiyyətə çatdırılmasından sonra məsələ sosial şəbəkələrdə geniş müzakirələrə səbəb olub.
Yüzlərlə vətəndaş Gəncə kimi böyük və əhalisi sıx olan bir şəhərdə Yeni ilin rəsmi şəkildə qeyd edilməməsindən narazılıq edərək, şəhər rəhbərliyinin bu məsələdə passiv mövqe tutduğunu vurğulamışdı.
Məhz bu ictimai təzyiq və sosial şəbəkələrdə səsləndirilən haqlı iradlardan sonra şəhər rəhbərliyi tərəfindən atəşfəşanlığın təşkil olunması qərarı verildiyi ehtimal olunur.
Redaksiyamız tərəfindən bayram tədbirinin və atəşfəşanlığın əvvəlcə keçirilməməsi, daha sonra isə təşkil edilməsi qərarının hansı səbəblərdən qaynaqlandığını aydınlaşdırmaq məqsədilə Gəncə Şəhər İcra Hakimiyyətinə rəsmi sorğu göndərilsə də, sorğumuza cavab verilməyib.
