Gəncədə universitet və təşkilat arasında memorandum imzalanıb. Bu haqda 2 fevral tarixində Gəncə Dövlət Universitetinə istinadən məlumat veririk.
Gəncə Dövlət Universitetinin rektoru Yusif Yusibov Bakı 15 saylı Mediasiya Təşkilatının direktoru Qasım Şaliyevlə görüş keçirib. Tədbirdə universitetin Tədris məsələləri üzrə prorektoru Şahin Xurşudov, İnnovasiyalar Departamentinin direktoru Vasif Həsənov, universitetin Mediasiya Mərkəzinin müdiri Ruslan Məmmədov iştirak ediblər.
Rektor Yusif Yusibov universitetin əsas tədris binasında İnnovasiyalar Departamentinin nəzdində yaradılan Mediasiya Mərkəzi və bu sahədə görülən işlər haqqında ətraflı danışıb. Görüş zamanı GDU və Bakı 15 saylı Mediasiya Təşkilatı arasında mediasiya sahəsində qarşılıqlı əməkdaşlığın inkişaf etdirilməsinə dair memorandum imzalanıb.
Anlaşmaya əsasən, tələbələrin nəzəri biliklərinin artırılması, onlar üçün təcrübə imkanlarının yaradılması və birgə tədqiqatların aparılması nəzərdə tutulur. Memorandum çərçivəsində universitetin Mediasiya Mərkəzində müvafiq kurs keçən tələbələrin tədqiqat-araşdırma, kurs və buraxılış işlərinin, magistrantların dissertasiya mövzularının təşkilatın həyata keçirdiyi layihələrin məzmunu ilə əlaqələndirməsi üçün şərait yaradılacaq.
