Gəncə şəhər sakinini bıçaqla xəsarət yetirərək öldürməkdə şübhəli bilinən şəxs istintaqa cəlb edilib. Bu haqda 27 yanvar tarixində DİN-ə istinadən xəbər veririk.
Goranboy Rayon Polis Şöbəsinə yanvarın 26-sı saat 14:30 radələrində Baxçakürd kəndi ərazisində Gəncə şəhər sakini S.Məmmədovanın ölməsi barədə məlumat daxil olub.
Rayonun polis və prokurorluq orqanlarının əməkdaşları tərəfindən müvafiq tədbirlər həyata keçirilib.
Araşdırmalarla Gəncə şəhər sakini, əvvəllər məhkum olunmuş A.Ələkbərovun idarə etdiyi “Niva” markalı avtomobildə münaqişə zəminində həmyerlisi S.Məmmədovanı bıçaqla xəsarət yetirərək öldürməsinə dair əsaslı şübhələr müəyyən olunub.
A.Ələkbərov polis əməkdaşları tərəfindən tutularaq istintaqa təhvil verilib. Faktla əlaqədar Cinayət Məcəlləsinin 120-ci (Qəsdən adam öldürmə) maddəsi ilə cinayət işi başlanıb.
