Gəncə sakini Fransada Gürcüstan vətəndaşını öldürüb. Bu haqda 3 fevral tarixində Lent.az-a istinadən məlumat veririk.
Fransanın Nant şəhər Prokurorluğunda “mütəşəkkil dəstə tərəfindən qəsdən adam öldürmə” maddəsi ilə cinayət işi açılıb. Azərbaycanlı Gürcüstan vətəndaşı Elbrus Qaracayev ötən ilin aprelində itkin düşüb. Bir müddət sonra Fransa polisi onun yandırılmış avtomobilini aşkar edib.
Elbrusun yaxınları Gürcüstanın saytlarından birinə müsahibə veriblər. Onların sözlərinə görə, qətl hadisəsində 3 nəfər iştirak edib. Biri Marneulidən olan İlkin Dəlivəlov, digər ikisi isə onun dostları olan Gəncə və Neftçala sakinləridir.
Qaracayevin yaxınlarının sözlərinə görə, qətl hadisəsi qısqanclıq zəminində baş verib. Elbrus Qaracayev İlkin Dəlivəlovun çalışdığı avtomobil sexinə gedib və burada yaranan mübahisə daha sonra Elbrusun beş bıçaq zərbəsi ilə qətlə yetirilməsi ilə nəticələnib.
Fransa mediası yazır ki, Elbrus Qaracayev Nant şəhərinə ailəsi ilə birgə 2 il əvvəl gəlib və sığınacaq üçün müraciət edib.
