Gəncədə fəaliyyət göstərən LED lampalar zavodunun işləməmə səbəbi açıqlanıb. Bu haqda 25 fevral tarixində Bizim.media-ya istinadən məlumat veririk.
2021-ci ilin dekabrında işə başlayan zavod artıq 6 aya yaxındır ki, fəaliyyətini dayandırıb. Buna səbəb çinli tərəfdaşların müqavilənin şərtlərinə əməl etməmələri olub.
Müəssisənin rəhbəri Zəfər Məmmədov bildirib ki, Çinin “ZHONGSHAN RACHEL LİGHTİNG” CO LTD şirkəti ilə ikitərəfli razılaşma əldə olunaraq müqavilə bağlanmışdı.
“Nümayəndəmiz həmin şirkətdə olub və alacağımız xammala baxıb, razılıq əldə edilib. 13 iyul 2022-ci ildə həmin şirkətin hesabına ilkin mərhələdə 62 min dollar ödədik. Ümumilikdə isə 300 min dollarlıq xammal alınması üçün razılığa gəlmişdik. O gündən bu günə onlar nə bizim pulumuzu qaytarır, nə də xammalımızı göndərirlər. Buna görə də artıq uzun müddətdir ki, zavod fəaliyyətini dayandırıb”, - deyə Məmmədov qeyd edib.
Şirkət rəhbəri bununla bağlı bütün instansiyalara - Çinin Azərbaycandakı səfirliyinə, Azərbaycan Xarici İşlər Nazirliyinə, İqtisadiyyat Nazirliyinə kömək üçün müraciət etdiklərini deyir.
“Biz Çin Xalq Respublikasında həmin şirkəti məhkəməyə də vermişik. Ümid edirik ki, Azərbaycan Hökuməti də yerli şirkətin inkişaf etdirilməsi naminə bizə yardımçı və dəstək olacaq. Hələlik məhkəmənin qərarını gözləyirik”.
Zəfər Məmmədov, həmçinin bildirib ki, işlərin yenidən bərpa olunması üçün başqa şirkətlə danışıqlar aparıblar. Bu ilin aprel-may aylarında zavodun fəaliyyətinin tam bərpa olunması planlaşdırılır.
