Gəncədə bir çox sürücülərə xəbərdarlıq olunub. Bu haqda 23 dekabr tarixində Kəpəz televiziyasına istinadən məlumat veririk.
Fərqlənmə nişanı olmadan nəqliyyat vasitəsi idarə edən, marşrut xəttindən kənar rayonlararası sərnişin daşıyan, nəzərdə tutulduğundan çox sərnişin daşıyan sürücülərlə bağlı reyd keçirilib. Gəncədən Daşkəsən-Gədəbəy və Şəmkir, Tovuz, Ağstafa, Qazax rayonlarına sərnişin daşıyan nəqliyyat vasitələrində aşkarlanan pozuntularla bağlı daşıyıcılara xəbərdarlıq edilib.
Reydin keçirildiyini görən sürücülərin bir qismi nəqliyyat vasitəsini sürərək ərazidən uzaqlaşıb, digərləri isə müxtəlif bahənə ilə inandırmağa çalışırlar ki, idarə etdikləri mikroavtobusun fərqlənmə nişanı var. Gəncədən, əsasən, qərb istiqamətinə sərnişin daşıyan sürücülər qaydalara əməl etmir.
Qeyd edək ki, gün ərzində Gəncə Avtovağzal MMC-dən 20-yə yaxın xətt üzrə sərnişin daşınır.
