Gəncəli qadın Türkiyədə seçkilərdə iştirak etmək arzusundadır. Bu haqda 24 yanvar tarixində Marja-ya istinadən məlumat veririk.
Vəfa Aktuz bu il Türkiyə Böyük Millət Məclisinə seçkilərə qatılmaq niyyətindədir. Gəncədə doğulan, 3 yaşında Moskvada ayaqlarını itirən və İstanbulda uğurlu həyatı ilə nümunəyə çevrilən Vəfa Aktuz millət vəkili olmağa iddialıdır.
Xanım Türkiyədə müalicə alan azərbaycanlı qazilərə psixoloji və mənəvi dəstək göstərməsi ilə də böyük rəğbət qazanıb.
“Vətən uzaqda deyil” proqramının buraxılışı əsasında Vəfa Aktuz barədə qısa məlumat veririk. Gəncəli ailəsində anadan olan Vəfa xanım bir müddət sonra atasının işi ilə bağlı ailəsi ilə Moskvaya köçür. Burada 3 yaşı olanda uşaqlar üçün mağazaların birinin qarşısında qəza nəticəsində ayaqlarını itirib. Həkimlər və valideynləri onu üç gün ölü biliblər. Daha sonra uşağın sağ olduğu üzə çıxır.
Bir müddət sonra Vəfa xanımın qardaşı hovuzda boğularaq ölür. Bundan sonra ailə Gəncəyə dönür. Burada Vəfa xanım cəmiyyət tərəfindən qısnamalara məruz qalır. Bakıda təhsil alan zaman türk dərnəyi vasitəsilə Türkiyəyə dəvət olunur. O, burada şəxsi həyatı ilə yanaşı, dərnək qurur. Burada insanlara yardım əli uzadır.
Vəfa xanım Türkiyədə müalicə alan qazilərimizə də daim dəstək olur.
