“Yarımfinalda Avropa mükafatçısı olan erməni rəqibimlə qarşılaşdım və mən bu görüşdən rahat qalib gələrək ayrıldım” .
Bu sözləri sərbəst güləş üzrə Avropa və Dünya çempionatlarının medalçısı, gəncəli yeniyetmə Hüseyn İsmayılov Gencexeber.az-a müsahibəsi zamanı deyib.
Hüseynin 16 yaşı var və Gəncədə anadan olub. Uşaq yaşlarından idmanla məşğul olan müsahibimiz yeniyetmələr arasında daim seçilib. O, bu il keçirilən Avropa çempionatının gümüş medalçısıdır. Bundan başqa
İordaniyanın paytaxtı Amman şəhərində 17 yaşadək güləşçilər arasına təşkil edilən Dünya çempionatından da əliboş qayıtmayıb. Eyni uğur həmin yarışda da təkrarlanıb və o, ölkəmizə ikinci gümüş medalı gətirib.
Hüseyn İsmayılovla həmin müsahibəni təqdim edirik:
Mən, Hüseyn İsmayılov 2008-ci ildə Gəncə şəhərində anadan olmuşam. Nəriman Nərimanov adına 25 nömrəli tam orta məktəbin 11-ci sinif şagirdiyəm.
- Güləşə neçə yaşdan başlamısınız və niyə məhz güləş?
Güləşə uşaq yaşlarından başlamışam, elə uşaq yaşlarından da güləşə marağım var idi. Həmçinin ailəmin də güləşə sevgisi var idi. Ən böyük səbəblərdən biri də o idi ki, güləş Azərbaycanın milli idman növlərindən biridir. Məhz buna görə də güləşi seçdim.
- Karyeranız təhsilinizə mane olurmu?
İdmanla təhsil paralel şəkildə davam etsə daha gözəl olar. Mən də çalışıram ki, idmana ayırdığım vaxt qədər təhsilimə də vaxt ayırım. Çünki mənim üçün idman vacib olduğu qədər təhsil də vacibdir.
- Həmyaşıdlarınız arasında Avropa və Dünya çempionatlarının medalçısı kimi fərqlənmək necə hissdir?
Bu hisslər sözlə ifadə olunacaq bir hisslər deyil, amma onu da deyə bilərəm ki, Azərbaycan bayrağını dünyada dalğalandırmaq elə özü də fərqlənməkdir.
- Uğura gedən yolda nələri qurban verdiniz, hansı çətinliklərdən keçdiniz?
Ailə və mənəvi dəyərlərdən başqa uğura gedən yolda bir idmançı çox şey qurban verə bilir.
- Yarışlara hazırlıq zamanı daha çox nələrə diqqət edirdiniz?
Professional idmançı olmaq üçün qidalanmaya, yuxu rejiminə və həyat tərzinə fikir verməlisən. Çünki, professional idmançının həyat tərzi normal insandan seçilməlidir.
- Bu turnirlərdə ən çətin rəqibləriniz kimlər olub? Yarışda erməni güləşçi ilə qarşılaşmısınızmı?
Təbii ki, Dünya çempionatında asan rəqib olmur. Onu da qeyd edim ki, ¼-dəki rəqibim dünya çempionu idi. Buna görə görüş biraz ağır keçdi. Ondan sonra isə yarım final mərhələsində erməni rəqibimlə qarşılaşdım. O, Avropa mükafatçısı idi. Buna baxmayaraq, mən bu görüşdən rahat qalib gələrək ayrıldım.
- Gələcək üçün qarşınıza hansı məqsədlər qoymusunuz?
İndiki məqsədim bu il Avropa və Dünya çempionatlarında qazandığım gümüşü qızıl etməkdir. Amma ən əsas məqsədim Olimpiada kürsüsünün ən yüksək pilləsinə qalxmaqdır.
- Yerli yoxsa, beynəlxalq çempionatlarda daha çətin mübarizələr aparmısınız?
Dünya yarışlarını və arenasını görmək üçün, ölkədaxili çətinliklərin öhdəsindən gəlməlisən və mən də bunun öhdəsinən gəldim, dünya arenasının, yarışların çətinliklərini gördüm. Onu anladım ki, hər yarışın özünün çətinlikləri var.
- Uğurlarınızda ən böyük dəstəkçiniz kimlər olub?
Başda atam və ailəm olmaqla, şəxsi məşqçim Səbuhi Məmmədov və ətrafımda olan insanların hər biri mənə dəstək olub.
- Bu yarışlardan sonra zəif və güclü tərəflərinizi aşkar edə bildinizmi?
Güclü cəhətim odur ki, zəif tərəflərimi görürəm və bunları düzəldirəm. Bu yarışlarda da zəif cəhətlərimi gördüm və bunları inşallah düzəldəcəm. Ümid edirəm ki, bundan sonra bu zəif cəhətlərim olmayacaq.
- Dünya çempionatından sonra Gəncədə sizi necə qarşıladılar?
Yarışlarda Vətənə qayıdarkən Federasiya rəhbərliyinin, Gəncə idman rəhbərliyinin bizi qarşılaması, görüşməsi, xalqımızın bizə etimadı gələcək yarışlarda daha yaxşı nəticələr verməyə həvəs və gücdür.
- Böyük yarışlar öncəsi təzyiq və gözləntilərin öhdəsindən gəlmək çətin deyil?
Mənə qarşı olan gözləntilər məni daha məsuliyyətli edir. Çətin olsa da bu məsuliyyətin öhdəsindən gəlməyə çalışıram. İnanıram ki, gəlirəm.
- Nəticələriniz qarşınıza qoyduğunuz məqsədlərlə üst-üstə düşürmü?
Qazandığım uğurlar, nəticələr gözəl olsa da məqsədim Avropa, Dünya və Olimpiya birincisi olmaqdır.
- Güləşə yeni başlayan idmançılara nə məsləhət görərdiniz?
İdmana yeni başlayanlara onu deyə bilərəm ki, seçimlərində qərarlı olsunlar, məqsədləri olsun, məşqçilərə və böyüklərə qulaq assınlar ki, gələcəkdə böyük uğurlar əldə etsinlər.
