Gəncə Apellyasiya Məhkəməsində qəsdən adam öldürmə və qəsdən adam öldürməyə cəhddə təqsirləndirilən Rəşad Abbasovun barəsindəki hökmdən verilən apellyasiya şikayəti üzrə məhkəmə prosesi başa çatıb.
Pravda.аz xəbər verir ki, hakim Nural Əliyevin sədrliyi ilə keçirilən prosesdə qərar elan olunub.
İttihama görə, hadisə 21 noyabr 2024-cü il tarixdə, saat 21:00 radələrində Gəncə şəhərində qeydə alınıb.Belə ki, Rəşad Abbasov rəsmi qaydada boşandıqdan sonra aralarında olan ailədaxili münaqişələrin və ailəsinin dağılmasının səbəbini yaxın qohumlarının onlara hiss etdirdiyi ayrı-seçkiliyin təsiri nəticəsində olması qənaətinə gəlib. O, zərərçəkmişlər - anası, dayısı, dayısı arvadı, qardaşı və onun arvadının ailəsinin dağılmasında, yaranmış problemin həllinə laqeyd yanaşmaqda, xüsusilə də həyat yoldaşı ilə münasibətlərinin bərpası istiqamətində hər hansı dəstək və vasitəçilik göstərməməkdə günahlandırıb. Rəşad formalaşmış daxili qəzəb və narazılıq hissi fonunda şəxsi münasibətlər zəminində qisas almaq məqsədi ilə onları qəsdən öldürmək qərarına gəlib, cinayətkar niyyətinə uyğun olaraq qəsdən adam öldürməyə hazırlıq işləri görüb.
Təqsirləndirilən şəxs evdə saxladığı turist bıçağını götürüb birgə yaşadığı anası, qardaşı və qardaşı arvadını qəsdən öldürmək niyyəti ilə yataq otağına daxil olub. Lakin həmin vaxt onlar evdə olmayıblar. Sonra Rəşad dayısı Elyar Hüseynov və dayısı arvadı Ulduz Hüseynovanı qəsdən öldürmək niyyəti ilə həmin gün saat 21:00 radələrində yaşadıqları ünvana gedərək evin mətbəx otağına daxil olub. O, orada hər iki şəxsi bıçaqlayıb. Ulduz Hüseynova müalicə aldığı xəstəxanada ölüb.
Bununla da Rəşad Abbasov xüsusi amansızlıqla qadını qəsdən həyatdan məhrum etməklə öldürüb, iki şəxsi qəsdən öldürməyə cəhd edib, iki şəxsdən daha çox şəxsi, yəni üç nəfəri qəsdən öldürməyə hazırlıq edib.
Gəncə Ağır Cinayətlər Məhkəməsinin hökmü o, 19 il müddətinə azadlıqdan məhrum edilib. Hökmdə qeyd edilib ki, təqsirləndirilən şəxs cəzasının ilk 3 ilini həbsxanada, qalan hissəsini isə ciddi rejimli cəza çəkmə müəssisəsində çəkəcək.
Apellyasiya şikayəti isə təmin edilməyib.
