Heydər Əliyev 10 may 1923-cü ildə Naxçıvan şəhərində anadan olub. O, 1939-cu ildə Naxçıvan Pedaqoji Texnikumunu bitirib. Daha sonra indiki ADNSU-nun memarlıq fakültəsinə daxil olub. Ancaq İkinci Dünya müharibəsinin başlanması nəticəsində Heydər Əliyev sözügedən ali məktəbdə təhsilini başa vurmayıb. O, 1957-ci ildə indiki BDU-nun tarix fakültəsini bitirib.
Heydər Əliyev 14 iyul 1969-cu ildə Azərbaycan Kommunist Partiyası Mərkəzi Komitəsinin birinci katibi olandan sonra onun təşəbbüsü ilə Gəncənin sosial-iqtisadi inkişafına başlanılıb.
Heydər Əliyev 1970-ci ilin aprel ayında Gəncəyə ilk işgüzar səfərini etmişdir. 1977-ci ilin noyabrında Heydər Əliyev yenidən Gəncəyə gəlir. Bu səfərlərin nəticəsi olaraq sənaye obyektləri tikilmiş, körpülər, bağlar, parklar salınmış, elm, təhsil ocaqları istifadəyə verilmişdir.
1980-ci ilin iyul ayında Heydər Əliyev Gəncə hava limanının yeni uçuş xətlərinin açılışında iştirak edib. Dekabr ayında isə şəhərin sənaye müəssisələrinə baş çəkib. Bu, onun Gəncəyə birinci katib olaraq etdiyi son səfər olur.
Çini qablar zavodunun, qənnadı fabrikinin, taxıl məhsulları, xalça, ət və süd kombinatlarının inşası da məhz Heydər Əliyevin adı ilə bağlıdır. Həmçinin Yeni Gəncə və Gülüstan yaşayış sahələri, avtomobilçilər qəsəbələrinin salınmasında onun əməyi olub.
Heydər Əliyev 1993-cü ildə Azərbaycanın Prezidenti seçildikdən sonra ilk işgüzar səfərini Gəncəyə edib. Daha sonra ulu öndər buraya 7 oktyabr 1998-ci ildə səfər edib və Gəncə qarnizonunun əsgər və zabitlərilə görüşüb. Həmçinin şəhər və ətraf rayonların seçicilərilə görüş keçirib.
23-24 may 2000-ci ildə baş tutan səfərdə Heydər Əliyev şəhərdə təbii qazın, su və elektrik enerjisinin təchizatında olan qüsurları aradan qaldırmaq üçün bir sıra tapşırıqlar verib.
12-13 sentyabr 2002-ci ildə Heydər Əliyev Gəncə Olimpiya İdman Kompleksinin açılışında iştirak edib. O, şəhərdə müşavirə keçirib və Gəncənin sosial-iqtisadi vəziyyəti haqda danışıb. Bu, Heydər Əliyevin Gəncəyə son səfəri olub.
Heydər Əliyev 12 dekabr 2003-cü ildə xəstəlikdən ABŞ-da klinikada vəfat edib və 15 dekabr Bakıda Fəxri xiyabanda dəfn olunub.
Gəncədə Heydər Əliyevin adını daşıyan prospekt, park, Xatirə muzeyi və abidəsi mövcuddur.
Mənbələr:
