20 fevral şəhid Elçin Kərimovun dünyaya göz açdığı gündür.
Elçin Kərimov 1972-ci il fevralın 20-də Gəncə şəhərində anadan olub. O, orta təhsilini 25 saylı orta məktəbdə alıb. Sonra 9 №-li texniki-peşə məktəbində oxuyub. Maşınqayırma üzrə çilingər sənətinə yiyələnib. İdmanın boks növü ilə məşğul olub. 2 dəfə (1986,1990) Azərbaycan, 1 dəfə (1987) SSRİ çempionu olub.
Elçin Kərimov 1992-ci il martın 15-də Kəpəz Rayon Hərbi Komissarlığı tərəfindən hərbi xidmətə çağırılıb. Əsgər yoldaşları arasında böyük hörmət qazanıb. Elçin Kərimov Ağdərə yaxınlığındakı ermənilərin silahlı texnikasına ağır zərbələr endirdiyinə görə 864 saylı hərbi hissənin komandiri tərəfindən Fəxri Fərman və 1 həftəlik məzuniyyət vərəqəsi ilə mükafatlandırılıb. Marquşevan, Hadrut rayonlarında qanlı döyüşlərdə olub.
Elçin Kərimov 1992-ci il avqustun 15-də Yenikənd uğrunda gedən döyüşdə şəhadətə ucalıb. Məzarı Gəncə Şəhidlər xiyabanındadır.
