Gəncədə şəhər sakinləri silah və narkotik üstündə saxlanılıblar. Bu haqda 27 fevral tarixində Report-a istinadən məlumat veririk.
2-ci Polis Şöbəsinin əməkdaşları əməliyyat keçiriblər. Nəticədə Nicat Mehtiyev saxlanılıb. O, silsilə oğurluq hadisələri törədib. İstintaq-əməliyyat tədbirləri nəticəsində onun qanunsuz olaraq əldə edib saxladığı 1 ədəd qundağı və lüləsi kəsilmiş ov tüfəngi, 3 ədəd həmin tüfəngə məxsus 16 kalibrli patron və 1 ədəd giliz aşkar olunaraq götürülüb.
4-cü Polis Bölməsi əməkdaşlarının keçirdiyi əməliyyat zamanı isə Elmir Vəliyev adlı şəxs saxlanılıb. Onda 1 ədəd “Kalaşnikov” markalı avtomat, həmin silaha aid bir ədəd daraq və 1 ədəd patron aşkar edilib.
3-cü Polis Bölməsinin əməkdaşları Ruslan Qasımov və İlqar Əliyevi saxlayıblar. Onlar şəhər ərazisindəki avtomobilə qanunsuz daxil olaraq oğurluq ediblər.
Bundan başqa, Baş Polis İdarəsi və ona tabeli qurumların əməkdaşlarının keçirdikləri əməliyyat-axtarış tədbirləri nəticəsində narkotik vasitə əldə edib saxlamaqda şübhəli bilinən 10-a yaxın şəxs saxlanılıb. Üzərində marixuana, heroin, tiryək və metamfetamin aşkarlanan həmin şəxslər istintaqa təhvil veriliblər.
Faktlarla bağlı araşdırmalar davam etdirilir.
