Gəncədə təhsil müəssisəsində təyinat olub. Bu haqda 1 avqust tarixində ATU-ya istinadən məlumat veririk.
Azərbaycan Texnologiya Universitetinə strateji inkişaf və rəqəmsallaşma üzrə rektor müşaviri təyin edilib. Bu vəzifəni Mehman Kərimov yerinə yetirəcək.
Mehman İlham oğlu Kərimov 21 noyabr 1993-cü ildə Gəncədə anadan olub. 2014-cü ildə Azərbaycan Dövlət Aqrar Universitetinin mühasibat uçotu və audit ixtisasını bitirib. 2016-2018-ci illərdə Hökumətlərarası Təqaüd Proqramı (HTP) ilə Macarıstan Respublikasının Kaposvar Universitetində regional və ətraf mühit iqtisadiyyatı ixtisası üzrə magistr təhsili alıb. Sonra HTP ilə Macarıstan Kənd Təsərrüfatı və Təbiət Elmləri Universitetində doktorantura təhsilinə başlayıb. 2022-ci ildə “Birbaşa xarici investisiyaların Türkiyə iqtisadiyyatına təsiri” mövzusunda dissertasiya işini uğurla müdafiə edərək fəlsəfə doktoru elmi dərəcəsinə layiq görülüb.
O, əmək fəaliyyətinə 2020-ci ildə ADAU-da assistent olaraq başlayıb. 13 sentyabr 2021-ci ildə burada Keyfiyyətin təminatı və strateji inkişaf şöbəsinin müdiri vəzifəsinə təyin edilib.
Akademik fəaliyyətini paralel olaraq davam etdirir. Təhsildə Keyfiyyət Təminatı Agentliyinin bir sıra qiymətləndirmə meyarları üzrə ekspert təlimlərini uğurla başa vuraraq, həmin qurumun eksperti kimi fəaliyyət göstərir. 20-dən çox elmi əsərin müəllifi və həmmüəllifidir.
