Gəncə Ağır Cinayətlər Məhkəməsində xuliqanlıq niyyətilə həyat yoldaşını bıçaqlamaqda təqsirləndirilən Mir Nəsib Hətəmovun (soyadı şərtidir) cinayət işi üzrə məhkəmə araşdırması zamanı hadisənin təfərrüatları açıqlanıb.
Hakim Elşən Vəliyevin sədrliyi ilə keçirilən prosesdə ittiham aktı elan olunub.
İttihama görə, Mir Nəsib ötən il Gəncə şəhərində yaşadığı fərdi yaşayış evində arvadı, zərərçəkmiş Bəsti Hətəmova (soyadı şərtidir) ilə mübahisə edib. Mübahisəyə səbəb qadının ərinə mütəmadi olaraq spirtli içki qəbul etməsinə irad bildirməsi olub. Təqsirləndirilən şəxs bunu bəhanə edərək bıçaqla arvadına ardıcıl olaraq iki dəfə zərbə endirib.
Mir Nəsib Hətəmov barəsində Cinayət Məcəlləsinin 126.2.4-cü maddəsi ilə ittiham irəli sürülüb. Məhkəmə istintaqı zamanı Mir Nəsib Hətəmov həmin maddə ilə elan olunmuş ittiham üzrə özünü qismən, yəni həmin Məcəllənin 126.1-ci maddəsi ilə təqsirli bilib. O deyib ki, həyat yoldaşını qısqanclıq məqsədilə vurub.
Təqsirləndirilən şəxsin sözlərinə görə, həyat yoldaşına bir neçə dəfə telefonunun şifrəsini dəyişdirməməsini bildirdiyini, lakin onun şifrəni tez-tez dəyişdirdiyini deyib. Həmçinin arvadının "TikTok" sosial şəbəkəsindən istifadə etməsini istəmədiyini, lakin onun bu tələbinə məhəl qoymadığını bildirib.
Məhkəmədə qadın həyat yoldaşından şikayətçi olmadığını və onunla barışdığını bildirib. Bəsti Mir Nəsibin cəzalandırılmasını istəmədiyini də qeyd edib.
