Göygöldə baş verən zəhərlənmə hadisəsi ilə bağlı açıqlamalar verilib.
Report-un məlumatına görə, Səhiyyə Nazirliyi "Niasitol" preparatının idxalına icazə verilmədiyini bildirib. "Niasitol" adlı preparat Dərman Vasitələrinin Dövlət Reyestrində qeydiyyatdan keçməyib. Onun idxalına icazə verilməyib.
Məsələ ilə bağlı Azərbaycan Qida Təhlükəsizliyi Agentliyi isə bildirib ki, sözügedən dərman vasitəsi baytarlıq preparatı kimi Azərbaycana idxal olunur.
“Bu preparat müxtəlif növ heyvanların müəyyən parazitlərə qarşı mübarizəsində istifadə edilir. Preparatın hazırlanması, eləcə də istifadəsi mütləq şəkildə baytarlıq mütəxəssislərinin nəzarəti altında və iştirakı ilə həyata keçirilməlidir. “Niasitol”un insan üzərində istifadəsi qəti yolverilməzdir”, - deyə agentliyin Heyvan sağlamlığı şöbəsinin müdiri Qalib Əbdüləliyev qeyd edib.
Xatırladaq ki, Göygölun Balçılı kəndində 63 yaşlı nənə və 3 azyaşlı nəvəsi sözügedən preparatla başlarını yuyub zəhərləniblər. Nəticədə 10 yaşlı uşaq dünyasını dəyişib. Digərlərin vəziyyəti ağır və orta ağırdır.
