Bu gün şəhid Rəşad Ələkbərovun doğum günüdür.
Gencexeber.az xatırladır ki, Rəşad İlqar oğlu Ələkbərov 15 sentyabr 1997-ci ildə Gəncədə anadan olub. Gəncə şəhər 44 nömrəli məktəb-liseyi bitirib.
2016-ci ildə həqiqi hərbi xidmətə çağırılıb. 2020-ci ilin iyul ayında Tavuş mərzi və Tovuz rayonu əraziləri boyunca baş tutan döyüşlərdən sonra müharibədə iştirak etmək üçün müraciət edib. Rəşadın anası Nailə Ələkbərova I Qarabağ müharibəsinin iştirakçısı olub.1992-1993-cü ildə Tərtər və Ağdərə cəbhəsində döyüşüb. Düşmən tərəfindən atılan atəş zamanı yaxınlığına mərmi düşməsi nəticəsində yaralanıb.
Rəşad 27 sentyabr 2020-ci il tarixində yenidən ordu sıralarına çağırılıb. Vətən müharibəsi zamanı Xocavənd rayonunun Ağoğlan (Hadrut) qəsəbəsi, Füzuli rayonu, Şuşa şəhərinin Daşaltı kəndi və Xankəndi şəhəri istiqamətindəki döyüşlərdə vuruşub.
Rəşad İlqar oğlu Ələkbərov 9 noyabr 2020-ci ildə Laçın dəhlizi uğrunda gedən döyüşlərdə şəhidlik zirvəsinə yüksəlib. Şəhidimiz 3 gün sonra Gəncə şəhərinin Şəhidlər xiyabanında dəfn edilib.
O, ölümdən sonra Prezident tərəfindən "Vətən uğrunda", "Cəsur döyüşçü", "Şuşanın azad olunmasına görə" medalları və 3–cü dərəcəli "Vətənə xidmətə görə" ordeni ilə təltif edilib.
