Gədəbəydə almanlardan miras qalan körpülər mövcuddur.
Qızıl, kobalt, mis, gümüş və s. qiymətli metallarla zəngin olan Gədəbəy rayonu təbii sərvətlərilə tarixən xarici sahibkarları cəlb edib.
Türkoloq, alim Faiq Ələkbərli Gencexeber.az-a müsahibəsində bildirib ki, XIX əsrin əvvəllərində burada mis yataqları aşkar olunub. 1855-1856-cı illərdə isə yerli sahibkarlar tərəfindən misəritmə zavodu tikilir. Daha sonra, 1865-ci ildə Azərbaycana gələn məşhur alman brendi “Siemens” həmin zavodu alır. Qısa müddət ərzində Gədəbəy zavodu Avropada ən böyük metallurgiya mərkəzinə çevrilir.
İstehsalı artırmaq, xammal nəqlini asanlaşdırmaq üçün Simens qardaşları 1879-cu ildə Cənubi Qafqazda ilk dəfə 28 kilometr uzunluğu olan Gədəbəy-Qarakənd dəmir yolunu istifadəyə veriblər. Dörd lokomotiv və 33 vaqonun hərəkət edəcəyi dəmiryolu dağlıq-dərəlik ərazilərdən keçdiyi üçün, yol üzərində daş körpülər inşa edilmişdi. Həmin körpülərin sayı 7 olub.
Onlardan ən məşhuru “Qanlı körpü”dür. Bu adı körpüyə sakinlər veriblər. Yerli əhalinin verdiyi məlumat əsasən, o zaman mədəndə işləyən fəhlələri işdən evə daşıyan vaqon körpünün üstündən keçərkən aşıb. Nəticədə həmin fəhlələrin hamısı həlak olublar. O gündən sonra el arasında bu körpü "Qanlı körpü" adlandırılır.
Abidə zaman-zaman həm insan, həm də təbii dağıntılara məruz qalsa da, yenə öz əzəmətini və möhtəşəmliyini qoruyub saxlayır.
Qeyd edək ki, bu yer Cənubi Qafqazda ilk dəmiryol xəttinin keçdiyi ərazi olub. Hazırda isə Gədəbəyin “vizit kartı” hesab edilir.
[modula id="64856"]
