Gəncədə rüşvət üstündə tutulan dekanla bağlı cinayət işi başlanıb. Bu haqda 3 fevral tarixində Report-a istinadən məlumat veririk.
Baş prokurorun yanında Korrupsiyaya qarşı Mübarizə Baş İdarəsi tərəfindən həyata keçirilmiş əməliyyat-axtarış tədbirləri nəticəsində tələbələrdən rüşvət alan Azərbaycan Dövlət Aqrar Universitetinin dekanı Famil Nəsibovun qanunsuz əməlləri ifşa edilib.
Onun rəhbərlik etdiyi Baytarlıq təbabəti və zoomühəndislik fakültəsinin bəzi tələblərinin dərslərdə iştirak etməməsi və imtahanlarda məqbul qiymətlər yazılması müqabilində rüşvət almasına əsaslı şübhələr müəyyən edilib. Nəsibovun üzərində və xidməti otağında aparılan axtarış zamanı iş üçün əhəmiyyət kəsb edən sübutlar aşkar edilərək götürülüb.
Digər qanunazid halların müəyyən edilməsi istiqamətində tədbirlər davam etdirilir.
