Gəncədə Heydər Əliyevin yubileyi ilə əlaqədar tədbir keçirilib. Bu haqda 10 fevral tarixində Azərbaycan Dövlət Aqrar Universitetinə istinadən məlumat veririk.
ADAU-da ümummilli lider Heydər Əliyevin anadan olmasının 100 illik yubileyinə həsr olunan “Taxıl bitkilərində sort və hibridalma, onların toxumçuluğu, nailiyyətlər və perspektivlər” mövzusunda dəyirmi masa təşkil olunub. Rektor vəzifəsini icra edən Zəfər Qurbanov kadr hazırlığı prosesində fermer və müəssisələrlə birgə görülən layihələrin vacibliyini diqqətə çatdırıb.
Taxıl və paxlalı bitkilər sahəvi laboratoriyasının müdiri Firuddin Qurbanov taxıl bitkilərində sort və hibridalma, onların toxumçuluğu, nailiyyətlər və perspektivlər mövzusunda çıxış edib. Sonra fermer və müəssisə nümayəndələrinin mövzu ətrafında fikirləri dinlənilib.
Dəyirmi masadan sonra ADAU ilə “Agrovit” MMC arasında birgə əməkdaşlıq haqqında memorandum imzalanıb. Məqsəd müxtəlif təcrübə proqramlarının, seminar, dəyirmi masa və konfransların təşkil edilməsi, həmçinin gənc kadrların, xüsusilə aqronomluq sahələrində fəaliyyət proseslərinə cəlb olunmasıdır.
Sonda universitetin toxumçuluq sahələrinə baxış keçirilib.
