Gəncə şəhərində fəaliyyət göstərmiş Kirovabad Konfet-Şokolad Fabriki Azərbaycan qida sənayesinin və qastronomiya tarixinin parlaq nümunələrindən biridir.
Gencexeber.az Gəncə Regional Turizm İdarəsinə istinadən bildirir ki, sovet dövründə ölkənin ən qabaqcıl müəssisələrindən sayılan bu fabrikdə istehsal olunan məhsullar təkcə SSRİ respublikalarına deyil, eyni zamanda xarici ölkələrə də ixrac edilirdi.
Xüsusilə "Çinar" adlı əfsanəvi şokoladlar Azərbaycan mətbəxinin şokolad mədəniyyətini simvolizə edən dad nümunəsi kimi yadda qalıb. Zərif resepti, keyfiyyətli xammalı və özünəməxsus dadı ilə "Çinar" şokoladları dövrünün ən məşhur Moskva konfetləri ilə belə rəqabət aparırdı və bu, Gəncənin qənnadıçılıq ənənələrinin yüksək səviyyəsindən xəbər verirdi.
1930-cu illərdə milli şirniyyat ustalarının birləşdiyi kiçik sənət artelindən başlayan bu istehsal yolu, 1935-ci ildən etibarən konfet-şokolad fabriki, daha sonra isə iri istehsal kombinatı kimi fəaliyyətini davam etdirmişdi. Burada şokolad və konfetlərlə yanaşı, biskvitlər, peçenyelər, vaflilər və milli un məmulatları da hazırlanırdı.
Bu gün Kirovabad şokoladları Gəncənin sənaye tarixini, zəngin qastronomik irsini və şəhərin yaradıcı potensialını əks etdirən mühüm mədəni dəyər kimi turizm baxımından xüsusi əhəmiyyət daşıyır.
