Gəncədə yol hərəkəti qaydalarını kobud şəkildə pozan xanım sürücü barədə tədbir görülüb. Bu haqda 4 iyul tarixində Oxu.az-a istinadən xəbər veririk.
Sürücü Aysu Nurəliyeva idarə etdiyi 77-FB-782 qeydiyyat nişanlı "Chevrolet" markalı avtomobillə manevr qaydalarını pozub. O, özünü videoya çəkərək sosial şəbəkə hesabında paylaşıb. Paylaşdığı videonun rəy bölməsində sürücülük hüququnun olmadığını və ona verilən suala cavab olaraq "day-dayılıq" edəninin olduğunu bildirib.
Daxili İşlər Nazirliyinin Mətbuat Xidmətinin Gəncə regional qrupu tərəfindən keçirilən araşdırmalar zamanı şəxsin avtomobili sürücülük hüququ olmadan idarə etməsi müəyyən olunub. Xanımın tanışı öz adına avtomobil icarəyə götürüb və xanıma bir neçə saatlıq sürmək üçün verib. Aysu Nurəliyeva ilə profilaktik söhbət aparılaraq barəsində inzibati protokol tərtib olunub.
