Gəncənin mərkəzi küçəsi illərdir təmirsizdir. Bu haqda 9 iyul tarixində Bizim.Media.az-a istinadən xəbər veririk.
Söhbət Zərifə Əliyeva küçəsindən gedir. Buranın sakinlərinin sözlərinə görə, ərazidə xeyli müddətdir abadıq işləri aparılmır. Yolların bərbad olması həm uşaqlara, həm də yaşlı nəslə böyük problemlər yaradır.
“Biz uzun illərdir yağışlar yağanda, demək olar ki, evimizdən çölə çıxa bilmirik. Şəhərin mərkəzində yaşayırıq. Məcburi rezin ayaqqabı, qaloş geyinirik. Uşaqları məktəbə göndəririk, palçığın içindən keçib gəlirlər. Qonşunun biri də palçıqlı havada yıxılıb, qolunu sındırıb. Dəfələrlə aidiyyəti qurumlara şikayət etmişik, ərizələr yazmışıq, məktublar göndərmişik. Hər dəfə bir əncam çəkəcəklərini desələr də, illərdir baxan yoxdur”, - deyə küçənin sakinləri bildiriblər.
Bundan əlavə, sakinlər şəhərin mərkəzində 6-7 binanın yerləşdiyi ərazidə uşaqlar üçün oynamağa bir meydançanın olmadığından da şikayətlənirlər. Onlar qeyd ediblər ki, məsələ ilə bağlı Şəhər İcra Hakimiyyətinə müraciət ediblər. Sorğularına cavab olaraq bildirilib ki, şəhərdə həyata keçirilən “Abad məhəllə” layihəsi çərçivəsində çoxmənzilli yaşayış binalarının həyətləri mərhələli şəkildə abadlaşdırılır. Zərifə Əliyeva küçəsində yerləşən binaların ərazisi də qeydiyyata götürülüb və mərhələ ilə növbəsi çatanda bu ərazi də abadlaşdırılacaq.
