Gəncə İdman Sarayında Regional Voleybol Klubunun yeniyetmə voleybolçuları ilə hesabat xarakterli görüş keçirilib. Bu haqda 22 iyul tarixində İcra Hakimiyyətinə istinadən xəbər veririk.
Görüşdə İcra Hakimiyyətinin başçısı Niyazi Bayramov, Azərbaycan Voleybol Federasiyasının (AVF) prezidenti Şahin Bağırov, Regional Voleybol Klubunun təsisçisi və rəhbəri Pərviz Qədirov, Gəncə Voleybol Klubunun prezidenti Elvar Osmanov, “Rövşən Oğuz Qrup” MMC-nin direktoru Hafiz Mustafayev və digər rəsmilər iştirak ediblər.
Əvvəlcə Regional Voleybol Klubunun fəaliyyətini əks etdirən videoçarx nümayiş olunub. Daha sonra rəsmilər qızlardan və oğlanlardan ibarət komandaların məşq prosesini, tədbirin davamında isə komandalar arasında təşkil olunan oyunu izləyiblər. Qeyd edək ki, məşq toplanışında Gəncə Regional Voleybol Klubunu əhatə edən şəhər və rayonlardan 20-si oğlan, 40-ı qız olmaqla, ümumilikdə 60 yeniyetmə voleybolçu iştirak edib.
