Gəncədə tibbi konfrans keçirilib. Bu haqda 7 iyul tarixində Birləşmiş Xəstəxanaya istinadən məlumat veririk.
"Qeyri-infeksion xəstəliklərlə (QİX) mübarizədə ailə həkiminin rolu" mövzusunda konfrans şəhər Birləşmiş Xəstəxanasında təşkil olunub. Tədbir İlkin Səhiyyə Xidməti üzrə Ailə Sağlamlıq Mərkəzlərinin həkim-terapevtlərinin iştirakı ilə baş tutub. Konfransda Gəncə ŞBX-nin direktoru İlkin İsmayılov, direktor müavini, ilkin səhiyyə xidmətinin rəhbəri Xalidə Sadıqova, Cavadxan ASM-in şöbə müdiri Nurlana Zeynalova, kardioloq Jalə Namazova və digər həkim-mütəxəssislər iştirak ediblər.
Kadr potensialının bilik və bacarıqlarının artırılması istiqamətində keçirilən görüşdə QİX qrupuna aid ürək-damar xəstəlikləri, şəkərli diabet və insulin rezistentlik, tütün istifadəsinin zərərləri, piylənmə və onun fəsadları müzakirə olunub. QİX qarşısının alınmasında profilaktik tədbirlər və sanitar maarifləndirmə, erkən aşkarlanma, müalicə və reabilitasiya xidmətlərinin gücləndirilməsinə dair tövsiyələr verilib.
