Gəncədə güclü küləyin fəsadları aradan qaldırılmayıb. Bu haqda Gencexeber.az-a 20 iyul tarixində məlumat daxil olub.
İyunun 26-sı baş vermiş tufan zamanı vətəndaşlardan birinin evinin dam örtüyü yararsız hala düşüb. Növbəti gün yağan leysan isə mülkün içərisində yerləşən əşyalara zərər vurub. Sakinin sözlərinə görə, evə yağış dolub.
Əraziyə Fövqəladə Hallar Nazirliyinin müvafiq komissiyası cəlb olunub və dəymiş zərər qiymətləndirilib. Lakin vətəndaş bildirir ki, bundan sonra o, dəfələrlə müraciət etsə də, tədbir görən olmayıb.
Sakin təbii fəlakət nəticəsində yaranmış fəsadların aradan qaldırılmasını istəyir. Həmçinin bildirilir ki, evə 2020-ci ildə ermənilərin raket atəşi zamanı da zərər dəymiş və bərpa olunmuşdu.
