Gəncə şəhər Mənzil Kommunal Təsərrüfatı İstehsalat Birliyinin Küçə İşıqlandırma şöbəsi tərəfindən şəhər ərazisinin küçə işıqlandırma sistemi mütəmadi olaraq yoxlanılır, ehtiyac olan yerlərdə təmir-bərpa işləri görülür. Bu haqda 5 iyul tarixində MKTİB-yə istinadən xəbər veririk.
Şəhərin bir sıra küçələrində birləşdirici kabellər yoxlanılır, nasazlıqlar aradan qaldırılır, yararlılıq müddəti bitmiş, işləməyən lampalar daha müasir və qənaətli, həmçinin işıqlandırma sahəsi daha geniş olan yeni LED lampaları ilə əvəzlənir. Bununla paralel olaraq, ehtiyac olan küçə və prospektlərdə yeni dirəklər basdırılır, müasir gecə işıqlandırma sistemi qurulur. Xatırladaq ki, analoji işlər bu günlərdə Əttarlar küçəsində də aparılıb. Bu həftə ərzində isə "Poçt" qəsəbəsi adlanan ərazinin küçələrində birləşdirici elektrik kabel dəyişdirilib, yeni lampalar salınıb. Heydər Əliyev prospektində nasaz dirəklər təmir edilib.
"Yeni Səbiskar" adlanan ərazinin işıqlandırma sistemində yaranan qüsurlar aradan qaldırılıb. Nizami Gəncəvi Məqbərəsinin ərazisində işıqlandırma sistemindəki mövcud boşluqlar təmir olunub. Bunlarla yanaşı, vətəndaşların haqlı şikayət və müraciətləri əsasında bir sıra ərazilərdə işıqlandırma sahəsində işlər həyata keçirilib. Bu sahədə görülən işlərin başlıca məqsədi Gəncədə piyadaların və nəqliyyat vasitələrinin gecə saatlarında təhlükəsiz hərəkətinin təmin edilməsidir.
