Gəncədə ziyarətgahın sanitar qovşağında natəmizlik müşahidə edilib. Bu haqda Gencexeber.az-a 17 iyul tarixində məlumat daxil olub.
Söhbət “İmamzadə” dini kompleksindən gedir. Aşura gününə həsr olunan tədbirə gələn vətəndaşlar sanitar qovşaq və dəstəmazxananın son halından narahat olublar. Sakinlər bildirirlər ki, burada natəmizlik olub və gün ərzində sözügedən məkanlar təmizlənməyib.
“Ötən gün “İmamzadə”yə çox sayda sakin, o cümlədən ətraf şəhərlərdən və hətta digər ölkələrdən gələnlər var idi. Amma ayaqyolu və dəstəmazxanasında döşəmə su olduğu üçün palçıq yaranmışdı. İnsanların axın etdiyi gün oranın təmiz saxlanılmasına nəzarət edilsə, yaxşı olardı. Məsələ ilə bağlı müvafiq tədbirlərin görülməsini istəyirik”, - deyə onlar qeyd ediblər.
