Gəncədə "İmamzadə” Məscid-Ziyarətgah Kompleksində genişmiqyaslı iməcilik və abadlıq işləri həyata keçirilib. Bu haqda 13 iyul tarixində MKTİB-yə istinadən xəbər veririk.
İslam dünyasının müqəddəs aylarından biri olan Məhərrəm ayında "İmamzadə" kompleksinə gələn sakinlərin və şəhərimizin qonaqlarının rahatlığının təmin olunması məqsədilə təmizlik, eləcə də abadlıq işləri görülüb. İşlər Mənzil Kommunal Təsərrüfatı İstehsalat Birliyinin canlı qüvvəsi və texnikaları tərəfindən təşkil edilib.
Üzeyir Hacıbəyov küçəsində “İmamzadə”yə qədər olan yolun sağ və sol hissəsində alaq otları biçilib, yaşıllıq massivlərinə aqrotexniki qulluq göstərilib, suvarılması təmin edilib. "İmamzadə” Kompleksinin ərazisində yaşıllıq aksiyası keçirilib. Burada mövcud olan güldanlara yeni mövsümi güllər əkilib. Bundan başqa, sözügedən məkanda daş, qum, torpaq qalıqları, xəzəl və məişət tullantıları yığılaraq daşınması təmin edilib. Müqəddəs ziyarətgahın gecə işıqlandırılmasının təmin edilməsi məqsədilə MKTİB-nin Küçə İşıqlandırması şöbəsi tərəfindən mövcud nasazlıqlar aradan qaldırılıb.
