Məhərrəm ayının 10-cu günü şiələr tərəfindən Aşura kimi tanınıb və matəm günü hesab edilir. Bunun səbəbi hicri təqvimi ilə 61-ci (680-ci il) ilin həmin günündə Peyğəmbər Məhəmmədin nəvəsi Hüseyn ibn Əli və tərəfdarlarının xəlifə I Yezid tərəfindən öldürülməsidir.
İmam Hüseyn xəlifə I Yezid Peyğəmbər sülaləsindən olmadığına görə hakimiyyəti öz nəslinə qaytarmaq istəyirdi. Hakimiyyəti əlində saxlamaq istəyən Yezid 4.500 nəfərlik qoşunu ilə Kufə istiqamətində yola çıxmış İmam Hüseyni əhatəyə alır. İmam 72 nəfər tərəfdarı və ailə üzvləri ilə birlikdə şəhid edilir. Döyüşün baş verdiyi yerdə sonradan indiki İraqın Kərbəla şəhəri salınıb. Bu şəhər Şiə və Ələvi məzhəblərinə görə, Məkkə, Mədinə, Qüds və Nəcəfdən sonrakı ən müqəddəs şəhər hesab edilir.
Aşura günü Gəncədə minlərlə insan İmamzadə kompleksinə toplaşır, ziyarətgahın ətrafında ehsan çadırları qurulur, şəhərin müxtəlif yaşayış massivlərindən ziyarətçilərin "İmamzadə"yə daşınması üçün pulsuz nəqliyyat vasitələri təşkil edilir.
