Bu gün şəhid Vüsal Əliyevin doğum günüdür.
Vüsal Bayram oğlu Əliyev 2 iyul 1980-ci ildə Gəncədə anadan olub. Orta təhsilini 10 nömrəli orta məktəbdə alıb. Dəfələrlə respublika səviyyəli olimpiadaların qalibi olub. Məktəbi bitirdikdən sonra - 1997-ci ildə Azərbaycan Dövlət Pedaqoji Universitetinin hərbi fakültəsinə daxil olub və 2001-ci ildə oranı fərqlənmə diplomu ilə bitirib.
25 dekabr 2002-ci ildə hərbi xidmətə çağırılıb. O, Ağcabədidə xidmət edib. Baş leytenant Əliyev tez bir zamanda xidmət etdiyi hərbi hissədə böyük hörmət qazanıb. Dəfələrlə hərbi hissə komandiri tərəfindən təşəkkürə layiq görülüb.
Vüsal Bayram oğlu Əliyev 11 iyun 2004-cu ildə Xocavənd təpəliyində yaralı əsgəri döyüş bölgəsindən çıxararkən düşmən snayperinin gülləsinə tuş gəlib. Hərbi xidməti başa vurmağa 10 gün qalmış Vüsal Əliyev qəhrəmancasına şəhidlik zirvəsinə ucalıb. Növbəti gün o, Gəncə Şəhidlər xiyabanında dəfn olunub.
