Xəbər verdiyimiz kimi, Gəncədə ötən il partlayan binanın sakinlərinə ödənilən kirayə pulları kəsilib.
Gencexeber.az məlumat verir ki, oktyabrın 18-də Gəncə şəhəri İsaq Cəfərov küçəsində baş verən partlayış nəticəsində dağılmış beşmərtəbəli yaşayış binasının sakinləri yerli hakimiyyət orqanlarından təxminən 2 aya yaxın müddət ərzində pullarını ala biliblər. Zərərçəkənlər ilk ödənişləri yalnız noyabrın 27-də - faciədən 41 gün sonra alıblar.
Məsələ ilə bağlı redaksiyamız tərəfindən Gəncə Şəhər İcra Hakimiyyətinə ünvanlanan sorğuya cavab olaraq qurumdan bildirilib ki, kirayə pulları sakinlərə ödəniləcək.
"Gəncə şəhəri, İsaq Cəfərov küçəsində yerləşən beşmərtəbəli yaşayış binasının iki blokunda yerləşən və yararsız hala düşmüş mənzillərin sakinlərinə ötən 9 ay ərzində kirayə haqlarının ödənilməsi təmin edilib. Binanın təmir işlərinin uzanması ilə əlaqədar olaraq, növbəti aylarda da kirayə haqlarının ödənilməsi zərurəti yaranıb. Məsələ yaxın günlərdə öz həllini tapacaq", – Gəncə Şəhər İcra Hakimiyyətinin açıqlamasında deyilir.
