Gəncədə sakinlərin kommunal problemi yaranıb. Bu haqda Gencexeber.az-a 10 iyul tarixində məlumat daxil olub.
Sözügedən hal şəhərin Cavadxan (Avtozavod) qəsəbəsində müşahidə olunur. Sakinlərin sözlərinə görə, buradakı qaz borularını illər öncə şəxsi vəsaitləri hesabına alıb çəkdiriblər. Hazırda ərazidə işlər gedir. Aidiyyəti qurumun əməkdaşları yeni qaz xətti çəkirlər.
Lakin sakinlər bildirirlər ki, öz hesablarına çəkdikləri borular mənimsənilir. Onların sözlərinə görə, qurumun əməkdaşları boruları kəsib, yük maşınına yükləyərək ərazidən daşıyırlar. Əhali məsələ ilə bağlı narazılıq bildirsə də, heç bir nəticə əldə etməyiblər.
“Qaz idarəsi deyir ki, borular mənim balansımdadır. Biz narazılıq bildirəndə deyirlər ki, kimə istəyirsən, müraciət et”, - deyə vətəndaşlar bildiriblər.
