Gəncədə təbiət hadisəsinin fəsadlarının aradan qaldırılması üzrə işlər aparılır. Bu haqda 24 iyul tarixində MKTİB-yə istinadən məlumat veririk.
Bir müddət öncə əsən güclü külək nəticəsində dam örtükləri yararsız hala düşən çoxmənzilli yaşayış binalarında və fərdi yaşayış evlərində təmir-bərpa prosesi həyata keçirilir. 20 Yanvar küçəsi, 7-ci dalan, ev 3 ünvanında ümumi məhəllədə yerləşən dörd evin dam örtüyü Mənzil Kommunal Təsərrüfatı İstehsalat Birliyi tərəfindən sökülərək yenilənib. Damın yeni taxta karkası yığılıb və "profnastil" metal konstruksiyası ilə örtülüb. İşlər evin 140 kvadratmetr sahəsində aparılıb.
Bildirilir ki, hazırda binanın dam örtüyünün metal "profnastillərinin" bərkidilmə işləri tamamlanmaq üzrədir.
Bundan başqa, MKTİB tərəfindən Tağı Arani küçəsi, döngə 1, ev 1; Şah İsmayıl Xətai prospekti, bina 101; Nizami Gəncəvi prospekti, bina 10; Həsən Əliyev küçəsi, bina 84; Heydər Əliyev prospekti, bina 90 ünvanlarında da yaşayış binalarının dam örtüklərində və novdan sistemindəki nasazlıqlar aradan qaldırılıb.
