Gəncədə Azərbaycan Dövlət Aqrar Universitetinin (ADAU) Baytarlıq təbabəti fakültəsində “Yaşıl gələcək naminə: heyvanları qoruyaq, ətraf mühiti təmiz saxlayaq” mövzusunda görüş keçirilib. Bu haqda 11 iyul tarixində ADAU-ya istinadən xəbər veririk.
İctimai müzakirədə çıxış edən “Səma və Eko” Sosial İqtisadi İnkişafa Yardım İctimai Birliyinin sədri İradə Həsənova qlobal iqlim dəyişikliklərinin ciddi fəsadlar verdiyini bildirib. Onun sözlərinə görə, son illər hökm sürən anomal hava şəraiti qlobal iqlim dəyişikliyinin fəsadlarındandır.
Daha sonra bir qrup tədbir iştirakçısı layihə çərçivəsində ətraf ərazilərin məişət tullantılarından təmizlənməsi aksiyası keçirib. Aksiyada şəhərin Ozan küçəsində yerləşən Tələbə parkının ərazisinə və ətraf küçələrə atılmış polietilen torbalar, su butulkaları, yemək qalıqları, meyvə çəyirdəkləri toplanaraq, məişət tullantıları qablarına atılıb. Sakinlərlə maarifləndirici söhbətlər aparılıb.
