“Gəncə” VK-nın təşkilatçılığı ilə festival çərçivəsində “Kids Volleyball” layihəsinə əsasən, uşaqlar arasında voleybol yarışları keçirilib. Bu haqda 8 iyul tarixində voleybol klubuna istinadən xəbər veririk.
Festivalda Gənclər və idman naziri Fərid Qayıbov və Göygöl Rayon İcra Hakimiyyətinin başçısı Elvin Paşayev “Gəncə” VK-nın düşərgəsində qonaq olublar və çay süfrəsi arxasında klubun prezidenti Elvar Osmanovla söhbət ediblər. Daha sonra voleybolçularla görüş olub. Qonaqlara “Gəncə” VK-nın “Kids Volleyball” komandası, voleybolçuların seçmə yarışlarda uğurla çıxış etdiyi və şəhərdə idmanın bu növünə olan böyük maraq barədə ətraflı məlumat verilib.
Həmçinin festival çərçivəsində ziyarətçilərə idmanın voleybol növünün qaydaları və topla rəftar barədə məlumat verilib. “Kids Volleyball” komandasının üzvləri festivalda "Gəncə" VK-nın Sağlam Ailə Tibb Mərkəzinin Gəncə "UltraLab" filialı ilə əməkdaşlığı çərçivəsində hazırlanmış formada iştirak ediblər. Bundan əlavə, festivalın ziyarətçiləri arasında voleybol yarışları təşkil olunub. Qaliblərə Sağlam Ailə Tibb Mərkəzinin Gəncə "UltraLab" filialı tərəfindən hədiyyələr təqdim olunub.
