Gəncə şəhərində kütləvi zəhərlənmə faktı qeydə alınıb. Bu haqda 12 avqust tarixində Report-a istinadən xəbər veririk.
Şəhərdə keçirilən yas mərasimlərin birində qonaqlar zəhərlənib. Burada zəhərlənənlərin sayı 100 nəfəri ötüb. Abbas Səhhət adına xəstəxanaya 83 nəfər, Z.Məmmədov adına 3 nömrəli xəstəxanaya isə 13 nəfər yerləşdirilib. Digər doqquz zərərçəkən isə Göygöl Rayon Mərkəzi Xəstəxanasında müalicə alır. Hazırda onlara zəruri tibbi xidmətlər göstərilir.
Baş verən hadisənin səbəbləri, həmçinin qida zəhərlənməsi olub-olmaması ilə bağlı araşdırmalara başlanıb.
Yas mərasimin sahibi Mahir Cəfərovun sözlərinə görə, yeməkdən sonra qonaqlar özlərini narahat hiss edib. Məhsulların hamısı bazardan, dükandan alınıb.
"Aidiyyəti qurumların əməkdaşları gəlib hər qidadan analiz üçün nümunələr götürdülər. Yaxın günlərdə zəhərlənmənin hansı qidadan baş verdiyini araşdırıb deyəcəklər", – deyə yas sahibi qeyd edib.
Faktla bağlı araşdırma davam etdirilir.
