Yaponiya televiziya sənayesinin ən uğurlu layihələrindən biri olan "VIVANT" serialının ikinci mövsümünün çəkilişləri Azərbaycanda uğurla tamamlanıb.
Gencexeber.az məlumat verir ki, serial "Tokyo Broadcasting System Television" (TBS Television) tərəfindən istehsal olunub. Yaponiyanın tanınmış kino mütəxəssisi Katsuo Fukuzava ekran əsərinin rejissorudur.
Birinci mövsümü Yaponiyada 60 milyondan artıq tamaşaçı tərəfindən izlənilən və hazırda "Netflix" platformasında yayımlanaraq beynəlxalq miqyasda geniş auditoriyanın rəğbətini qazanan "VIVANT", bu dəfə öz hekayəsini Azərbaycanın unikal təbiəti və çoxşaxəli mədəni mənzərəsi fonunda davam etdirdi.
Layihə üzrə tərəfdaş olan Bakı Media Mərkəzinin dəstəyi ilə serialın ikinci mövsümünün çəkilişlərinə bu ilin avqustunda start verilib. Çəkilişlər oktyabr ayının sonuna qədər davam edib.
Filmin çəkilişləri Gəncə ilə yanaşı ölkənin Bakı, Sumqayıt, Naxçıvan, Şamaxı, Qəbələ, Şəki və Quba şəhərləri də daxil olmaqla bir sıra bölgələrdə aparılıb. "VIVANT" serialının yeni mövsümünün 2026-cı ildə nümayişi planlaşdırılır.
