Hərbi Prokurorluqda Azərbaycan Ordusunun 21 yaşlı əsgəri Əli Cəfərovun ölümü ilə bağlı araşdırmalar davam edir.
Musavat.com xəbər verir ki, bu barədə mərhum əsgərin atası, Gəncə Dövlət Dram Teatrının rəssamı Vahab Cəfərov bildirib.
O qeyd edib ki, oğlunun xəstə olduğunu ailə son ana qədər bilməyib: "Bizə oğlumun xəstə olduğu barədə məlumat veriləndən sonra hospitala getdik. Xəstələndiyini də məhz orada öyrəndik. Oğlumu yalnız kənardan göstərdilər. Ağır vəziyyətdə idi. Dörd gün sonra isə onu itirdik. Təəssüf ki, həmin vaxt Əli ilə danışa bilmədim".
Məlumata görə, Əli Cəfərov Azərbaycan Dövlət Mədəniyyət və İncəsənət Universitetinin Kinorejissorluq fakültəsinin məzunu olub. O, Beyləqan rayonunda yerləşən "N" saylı hərbi hissədə müddətli həqiqi hərbi xidmət keçirmiş. 5 ay əvvəl hərbi xidmətə çağırılan gənc əsgər dekabrın 15-də Müdafiə Nazirliyinin Baş Klinik Hospitalında pnevmoniyadan vəfat edib. Əlinin nəşi dekabrın 17-də Gəncəyə gətirilərək torpağa tapşırılıb.
Hərbi Prokurorluğun yaydığı rəsmi məlumata əsasən, Azərbaycan Silahlı Qüvvələrinin hərbi qulluqçusu, əsgər Əli Vahab oğlu Cəfərovun xəstəlik səbəbindən müalicə aldığı hospitalda vəfat etməsi faktı üzrə Bakı Hərbi Prokurorluğunun əməkdaşları tərəfindən müvafiq istintaq hərəkətləri həyata keçirilir.
"Ölümün səbəbinin dəqiq müəyyən edilməsi məqsədilə ekspertiza təyin olunub, eləcə də digər prosessual tədbirlər icra edilib. Faktla bağlı araşdırma hazırda davam etdirilir", - deyə, məlumatda qeyd olunub.
