Viktor Klayn 1935-ci il sentyabrın 1-də Göygöldə dünyaya göz açıb. Yaşadığı evi isə 1886-cı ildə ana tərəfindən babası Yoşua Klayn tikib. İxtisasca Viktor radiotexnik olub.
Gencexeber.az məlumat verir ki, İkinci Dünya Müharibəsi zamanı, almanəsilli şəxslər hakimiyyətin tapşırığı əsasında SSSR-nin digər ərazilərinə deportasiya olunmağa başlayanda, Viktorun bəxti gətirir: onun atasının əslən polşalı olması ailəsini zorla köçürülməkdən xilas edir. Sözügedən amil onlara Göygöldə qarışıq ailələr arasında yaşamağa imkan verir.
Heç vaxt ailə qurmayan Viktor tənha həyat sürüb. Kişi yaşa dolduqca evinin gələcəyi barədə də düşünməyə başlayıb. O, binanı azərbaycanlı dostuna hədiyyə etmək fikrinə gəlsə də, onların dostluğunun əmlak üzərində qurulduğu haqda yarana biləcək şayiələrdən narahat olan həmin şəxs Viktora evi Almaniya səfirliyinə pay verməyi məsləhət görür. Viktor elə belə də edir.
Viktor Klayn 2007-ci il martın 29-da 72 yaşında vəfat edərək Göygöldə yaşayan sonuncu alman olub. O, dünyaya gəldiyi doğma şəhərindəki alman qəbiristanlığında dəfn edilib.
Viktorun evi isə muzeyə çevrilib. Almaniya səfirliyi Azərbaycan Mədəniyyət Nazirliyi ilə birgə tikilinin bərpasını həyata keçirib. Hazırda muzey kimi fəaliyyət göstərən həmin ev Azərbaycanda alman mədəniyyəti və tarixinin yaddaşını qoruyan mühüm abidələrdən birinə çevrilib.
