Gəncəli alpinist Mahir Hüseynov Qərb bölgəsinin ən yüksək zirvələrindən biri olan Qoşqar dağına qış zirvə yürüşü həyata keçirib. Şaxta və sıx dumanın müşayiət etdiyi çətin hava və mürəkkəb relyef şəraitində baş tutan yürüş uğurla tamamlanıb.
Gencexeber.az-a bu barədə idmançı məlumat verərkən bildirib ki, yürüşə Daşkəsən rayonunun Qaraqullar kəndindən start verilib. O, sərt qış şəraitinə baxmayaraq 3361 metr hündürlükdə yerləşən Qoşqar zirvəsinə çatmağı bacarıb. Marşrut daha sonra Xoşbulaq kəndinə enişlə davam etdirilərək uğurla başa çatdırılıb.
Bu yürüşün əsas məqsədi Qərb bölgəsində dağ turizminin inkişafına töhfə vermək, yeni marşrut yollarını kəşf etmək və regionun turistik potensialını artırmaqdır. Mahir Hüseynovun sözlərinə görə, Gəncə-Daşkəsən bölgəsi dağ turizmi üçün böyük imkanlara malikdir və bu istiqamətdə yeni marşrutların müəyyənləşdirilməsi gələcəkdə daha çox turist və dağ həvəskarını bölgəyə cəlb edə bilər.
Qeyd edək ki, Mahir Hüseynov ehtiyatda olan Xüsusi Təyinatlı Qüvvələr (XTQ) mayoru, sabiq komando tabor komandiridir. O, 2016-cı ilin aprelində baş tutan döyüşlərin, 44 günlük Vətən müharibəsinin, 2022-ci ildə keçirilən "Qisas" əməliyyatının və 2023-cü il lokal xarakterli antiterror əməliyyatlarının qazisidir.
Mahir Hüseynov xidmətləri zamanı "Rəşadət" ordeni və bir sıra medallarla təltif olunub. Hərbi xidmətdən ehtiyata buraxıldıqdan sonra dağçılıqla məşğul olan gəncəli idmançı hazırda Gəncə-Daşkəsən regionunda dağ idmanlarının inkişafı istiqamətində fəaliyyət göstərir. O, eyni zamanda yazıçıdır və altı kitab müəllifidir. Yazdığı romanlar ingilis və italyan dillərinə tərcümə olunub və əsərləri əsasında filmlər çəkilir.
