Gəncə şəhərinin Azərbaycan bayrağı küçəsində yaradılmış velosiped zolaqları avtomobil sürücüləri tərəfindən qanunsuz şəkildə zəbt olunur.
Məsələ ilə bağlı Gencexeber.az-a müraciət edən velosipedçilərin sözlərinə görə, zolaqların məqsədyönlü istifadəsinə mane olan sürücülər təhlükəsizlik qaydalarını da pozurlar.
Onlar iddia edir ki, zolaqların üzərində park edən avtomobillərlə bağlı nəzarət mexanizmi zəifdir və qayda pozuntularına qarşı adekvat tədbirlər görülmür. Bu isə sürücülərin məsuliyyətsizliyinə şərait yaradır.
Velosipedçilər aidiyyəti qurumlardan məsələni diqqətə almağı, nəzarəti gücləndirməyi və qanunsuz parklanmaya qarşı cərimələrin tətbiqini tələb edirlər. Onların fikrincə, yalnız bu halda velosiped yolları təyinatına uyğun istifadə oluna və şəhərdə təhlükəsiz hərəkət təmin oluna bilər.
