Ukraynada daha bir azərbaycanlı əsir düşüb.
Gencexeber.az məlumat verir ki, bu barədə ukraynalı jurnalist Yuri Butusov məlumat yayıb. 1982-ci il təvəllüdlü Azər Arzuman oğlu Əhmədov Rusiya ordusunun tərkibində döyüşərkən Ukrayna ərazisində əsir götürülüb.
Jurnalistin yayımladığı materialda Azər Əhmədovun Azərbaycan Respublikasının Prezidenti İlham Əliyevə videomüraciəti də yer alıb. Əsir müraciətində Gəncədə doğulduğunu, Sankt-Peterburq şəhərində yaşayarkən səhvə yol verərək, düşünmədən Rusiya Federasiyasının Müdafiə Nazirliyi ilə müqavilə imzaladığını deyib.
Azər Əhmədov müraciətində əsir düşdüyünü qeyd edərək, Ukraynadan çıxarılması və vətənə qayıtması üçün kömək göstərilməsini xahiş edib:
"Anam tək qalıb, məndən başqa heç kimi yoxdur. Xahiş edirəm, mənə kömək edəsiniz ki, vətənə qayıda bilim."
