Azərbaycan ərazisində mövcud olmuş 8 alman koloniyasından biri olan Traubenfeld XX əsrin əvvəllərində formalaşmış mühüm tarixi-mədəni yaşayış məkanlarından biridir. 1912-ci ildə Helenendorfdan (indiki Göygöl şəhəri) köçən alman ailələri tərəfindən indiki Tovuz şəhəri ərazisində salınmış Traubenfeld (alm. "Üzüm sahəsi") üzümçülük və şərabçılıq ənənələri ilə seçilib.
Alman icmasının yaşadığı dövrdə burada parklar salınıb, məktəb və uşaq bağçası, mədəniyyət klubu və musiqi orkestri, şərab zavodu fəaliyyət göstərib. Traubenfeld almanları idmana, xüsusilə futbola böyük maraq göstərib, 1914-cü ildə ilk futbol komandası yaradılıb, 1916-cı ildə isə stadion inşa olunub.
Tarixi mənbələrə görə, 1921-ci ildə əhali 306 nəfər, 1934-cü ildə 430 nəfər olub. 1941-ci ildə Traubenfeldin alman əhalisi sürgün edilib, sonrakı dövrdə isə Tovuz şəhəri böyüyərək bu ərazi ilə birləşib.
Bu gün Traubenfeld Tovuz şəhərinin tarixi hissələrindən biri kimi mövcuddur. Traubenfeld – Azərbaycanın çoxmədəniyyətli tarixinin, alman irsinin və üzümçülük ənənələrinin yaddaşıdır.
Mənbə: Gəncə Regional Turizm İdarəsi
