Gəncədə qısqanc kişi cinayət törədib.
Lent.аz xəbər verir ki, hadisəyə səbəb "TikTok" sosial şəbəkəsindəki yazışma olub.
İttiham aktına görə, bir nəfər 35 yaşlı Seymur Mirzəyevin (ad və soyad şərtidir) arvadına "TikTok"da mesaj yazaraq, əxlaqsız təklif edib. Seymur müəyyən edib ki, həmin mesajı yazan özünün sinif yoldaşı Rəşiddir (ad şərtidir). Buna görə də, o, Rəşidi idarə etdiyi avtomobilə əyləşdirərək, yazdığı mesajı göstərib və gözünə zərbə vurub. Sonra ard-arda Rəşidin sifətinə yumruqla zərbələr endirib. Seymur bununla kifayətlənməyərək, avtomobildə saxladığı bıçağa əl atıb, Rəşid isə özünü qorumaq üçün əli ilə bıçağın tiyəsindən tutub. Nəticədə bıçaq onun barmaqlarını kəsib. Bundan sonra zərərçəkən avtomobildən düşərək qaçıb.
Faktla bağlı Seymur Mirzəyev saxlanılıb və onun barəsində cinayət işi açılıb.
Təqsirləndirilən şəxs bildirib ki, arvadı ilə ikisi bir telefon işlədir. Onun sözlərinə görə, yoldaşının həmçinin "TikTok" hesabı da yoxdur və ona məxsus "TikTok" hesabından istifadə edir. Seymur Mirzəyev qeyd edib ki, Rəşid onun sinif yoldaşı olmaqla yanaşı, həm də qonşusudur. Avtomobildə ard-arda Rəşidin üzünə yumruqla vurandan sonra bıçaqla da zərbə endirmək istəyib. Lakin bıçaq Rəşidin əlini kəsib deyə, zərərçəkən maşından düşərək qaçıb.
Seymur Mirzəyev əməlindən peşman olduğuna, zərərçəkənlə barışdığına və körpə uşağının olmasına görə məhkəmədən bağışlanmasını istəyib.
Gəncə şəhər Məhkəməsinin qərarı ilə Seymur Mirzəyev barəsində 7 ay 22 gün müddətinə azadlığın məhdudlaşdırılması cəzası verilib.
