Gəncə şəhərinin təmir edilən Ozan küçəsində yolun çökməsi sakinlərin narazılığına səbəb olub.
Gencexeber.az-a ünvanlanan şikayətlərə görə, sözügedən ərazidə asfaltda yaranan qüsur normal nəqliyyat axınına problem yaradır, eyni zamanda tez-tez yol-nəqliyyat hadisələrinin baş verməsinə səbəb olur.
Sakinlərin sözlərinə görə, bir neçə ay əvvəl şəhərdə aparılan abadlıq və təmir işləri çərçivəsində Ozan küçəsinə də yeni asfalt örtüyü çəkilib. Lakin görülən işlərin üzərindən təxminən bir il keçməsinə baxmayaraq, yol örtüyündə yenidən nahamarlıqlar və çöküntülər yaranıb.
Şikayətçilər iddia edirlər ki, məhz həmin çöküntülər səbəbindən küçədə vaxtaşırı qəzalar baş verir. Onların sözlərinə görə, son günlər də ərazidə bir neçə yol-nəqliyyat hadisəsi qeydə alınıb.
Sakinlər aidiyyəti qurumlardan problemin qısa zamanda aradan qaldırılmasını və küçədə təhlükəsiz hərəkət şəraitinin bərpa olunmasını xahiş edirlər.
