Gəncə Apellyasiya Məhkəməsində yol qəzası törətməkdə təqsirləndirilən Alim Bəşirovun (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.аz xəbər verir ki, hakim Salman Hüseynovun sədrliyi ilə keçirilən prosesdə qərar elan olunub.
Qərara əsasən, apellyasiya şikayəti təmin edilməyib.
İttihama görə, hadisə 25 oktyabr 2024-cü il tarixdə, saat 07:45-də Göygöl rayonunda qeydə alınıb.
Belə ki, Alim Bəşirovun idarə etdiyi "Opel" markalı avtomobillə VAZ-21015 markalı maşın toqquşub. Nəticədə Fariz Məhərrəmov (2006), Xəyal Rzayev (1984) və Heydər Hüseynov (2006) xəsarət alıblar. Sərnişin Ramal Qurbanzadə (2006) isə aldığı xəsarətdən dünyasını dəyişib.
Göygöl Rayon Məhkəməsinin hökmü ilə Alim Bəşirov cəzasını məntəqə tipli cəzaçəkmə müəssisəsində çəkməklə 4 il müddətinə azadlıqdan məhrum edilib.
Qeyd edək ki, Fariz Məhərrəmov və Heydər Hüseynov, eləcə də qəza nəticəsində dünyasını dəyişən Ramal Qurbanzadə Azərbaycan Dövlət Aqrar Universitetinin tələbələri olublar.
