Uşaqlar arasında son vaxtlar səpkili infeksiya virusu yayılıb. Belə hallara xüsusən payız aylarında daha çox rast gəlinir. Artıq dərs ili də başlayıb. Uşaqlar bir-biriləri ilə daha çox təmasda olurlar. Xəstəlik sürətli şəkildə yayılır. Xəstəliyin spesifik müalicəsi olmadığı bildirilir.
Bəs görəsən, bu hansı xəstəliyin əlamətidir? Uşaqları virusdan qorumaq üçün nə etmək lazımdır?
Mövzu ilə bağlı Bakuplus.az-a açıqlama verən infeksionist Mərdan Əliyevin sözlərinə görə, yayılan infeksiya koksaki virusudur:
“Koksaki enteroviruslar qrupuna aid olan bir virusdur və uşaqlarda bir sıra xəstəliklərə səbəb ola bilər. Koksaki, adətən, dəridə qırmızı səpkilərlə müşayiət olunan bir viral infeksiyadır.
Koksaki infeksiyası, adətən, əl-ayaq və ağız vasitəsi ilə yayılır. Belə adlandırılmasının səbəbi əldə, ayaqda və ağızın dodaq ətrafında səpkilərə səbəb olmasıdır. Ağır keçən hallarda qızdırma müşahidə oluna bilir. Lakin əksər hallarda bədən hərarətinin yüksəlməsinə rast gəlinmir”.
M.Əliyev qeyd edib ki, yetkinlik yaşına çatan şəxslər bu xəstəliyə nadir hallarda yoluxa bilər:
“Yalnız səpkilər müşahidə olunur. Bu uşaq infeksion xəstəliyidir. Ağırlaşmalar müşahidə olunmur, yüngül keçən xəstəlikdir. Təxminən bir həftəyə tam sağalmaq olur. Müalicə təbii simptomatikdir. Qızdırma yüksək olarsa, hərarət düşürmək üçün bol maye qəbul etməli və ev şəraitində dincəlmək lazımdır. Xəstəlik valideynlərə keçmir.
Gigiyena qaydalarına riayət etmək, əlləri tez-tez yumaq və xəstə uşaqlardan uzaq durmaq bu infeksiyaların yayılmasının qarşısını almaq üçün mühüm addımlardır”.
